මට මොනා කරත් රට පවා දෙන්න එපා

මට මොනා කරත් රට පවා දෙන්න එපා

පෙර පැවති සියලු ආණ්ඩුවක්ම පාහේ ත්‍රස්තවාදය හමුවේ දණ නැමූ බවත්, වරෙක ජනාධිපතිවරයෙක් ඉන්දීය හමුදා ගෙන්වා, සාම ගිවිසුම් ගසා මේ රටේ උතුරු නැගෙනහිර ඉන්දියාවට බාරදුන් බව රාජපක්ෂ මහතා කියා සිටියි.

ඊළඟ ජනාධිපතිවරයා කොටින්ට ආයුධ ලබාදී, පොලීසියේ නිලධාරීන් 600 ක් පාවාදී, මිනිසුන් දහස් ගණනින් ඝාතනය කිරීමට එල්.ටී.ටී.ඊය ශක්තිමත් කළ බවද හෙතෙම සිහිපත් කළේය.

පසුව පැමිණි ජනාධිපතිවරිය තවලම් ගොස් ජාත්‍යන්තරය හමුවේ රට හෑල්ලුවට ලක් කළ බවත්, ස්වාධීනත්වය පාවාදුන් බවත් හිටපු ජනාධිපතිවරයා කියා සිටියේ ඊයේ (18) විහාරමහාදේවි උද්‍යානයේ පැවති “නිදහසේ පහන්වැට” රණවිරු සැමරුම් උළෙලට එක්වෙමිනි.

තමන් බලයට පැමිණෙන අවස්ථව වන විටත්, මෙම කුරිරු ත්‍රස්තවාදය පරාජය කළ නොහැකි බවට කරුණු ඒත්තු ගැන්වීමට විදේශ බලවේග උත්සාහ කළ බවද ඔහු සිහිපත් කළේය.

එසේ වුවද එකී විදේශ බලවේග වලට වඩා මේ රටේ ජනතාව ගැනත්, ඔවුන්ගේ වීරෝධාර පුතුන් ගැනත් තමාට විශ්වාසයක් පැවති බව රාජපක්ෂ මහතා පෙන්වා දුන්නේය.

අවසන් සටනේදී බෙදුම්වාදී කොඩිය බිම හෙළා සිංහ ධජය ඔසවන්නට තරුණයින් දහස් ගණනක් දිවි පිදූ බවත්, එසේ කරමින් රටට විජයග්‍රහණයක් උදාකර දුන්නේ නැවත මේ රටේ බෙදුම්වාදී කොඩිය එසවීමට නොවන බවත් ඔහු සිහිපත් කළේය.

එහෙත් එකී වීර දූ පුතුන් මේ තරම් ඉක්මනට අමතක කිරීමට හැකිවීම සම්බන්ධයෙන් වත්මන් රජය කනගාටුවිය යුතු බව ද රාජපක්ෂ මහතා කියා සිටියේය.

තමාට අවලාද නැඟීම හෝ බොරු චෝදනා නැඟීම පිළිබඳ ගැටළුවක් නොමැති බවත්, එසේ වුවද තමා සමග වෛරය නිසා රටට දිනා දුන් දේ අහිමි කරන්න එපා යයි තමා ඉල්ලා සිටින බවහිටපු ජනාධිපති මහින්ද රාජපක්ෂ මහතා අවධාරණය කළේය.

තවද තමාට අවලාද නැඟුවත්, හිරේ දැම්මත් පමණක් නොව ජීවිත උදුරා ගත්තත් එසේ කිරීමට කිසිසේත්ම ඉඩනොතබන බවද හිටපු ජනාධිපතිවරයා වැඩිදුරටත් කියා සිටියේය.

Share this: