නඩේ ගුරා චන්ද්‍රිකා උපකරණ වන්දනාවේ

නඩේ ගුරා චන්ද්‍රිකා උපකරණ වන්දනාවේ

විදුලි  සංදේශ නියාමන කොමිසමේ අවසරය නොමැතිව මෙරටට රැගෙන ඒමට උත්සහ කළ චන්ද්‍රිකා සන්නිවේදන උපකරණ  335  සහ දුරස්ථ පාලක 81 ක් සමග  දඹදිව වන්දනා නඩයක නඩේ ගුරෙක් බව කියන පුද්ගලයෙකු   කටුනායක බණ්ඩාරනායක ජාත්‍යන්තර ගුවන්තොටුපොලේදී  අද  රේගු නිලධාරීන් විසින් අත් අඩංගුවට ගනු ලැබීය.

සැකකරු  වරකාපොල ප්‍රදේශයේ දඹදිව වන්දනා චාරිකා සංවිධානය කරන්නෙකි.

රේගු මාධ්‍ය ප්‍රකාශක ලෙස්ලි ගාමිණී මහතා පැවසුවේ දඹදිව වන්දනාවේ යන බැතිමතුන්ගේ පහසුව  හා  ඔවුන්ට කරන ගෞරවයක්  ලෙස සාමාන්‍යයෙන්  ඔවුන්ගේ ගමන් මළු රේගුව විසින් පරීක්ෂා නොකරණ බවයි.

නමුත් දඹදිව වන්දනාවේ යන බැතිමතුන්ව අනිසි ලෙස යොදාගනිමින් කරනු ලබන චන්ද්‍රකා සන්නවේදන උපකරණ මෙරටට ගෙන ඒමේ ජාවාරමක් පිළිබඳ රේගුවට තොරුතුරු ලැබී  තිබුන බැවින් මෙම වැටලීම සිදු කල බවයි.

චන්ද්‍රකා සන්නිවේදන උපකරණ මෙරටට ආනයනය කිරීමේදී විදුලි සංදේශ නියාමන කොමිසමේ අවසරය මෙන්ම ආනයන පාලන දෙපාර්තමේන්තුවේ බලපත්‍රය   තිබිය යුතු බවත් ඔහු කීවේය.

සැකකරු  තම නඩයද සමග ශ්‍රී ලංකන් ගුවන්සේවයට අයත් යු.එල් 122 දරන ගුවන්යානයෙන් ඊයේ දහවල් මෙරටට පැමිණ ඇත. ඔහු සමග බැතිමතුන් 80 ක් පමණ මෙරටට පැමිණ සිටි බව රේගුව කියයි.

නඩයේ සාමාජිකයින් අත තිබු  එකම වර්ගයේ ගමන් මළු කිහිපයක් පිළිබඳ ඇති වු සැකයක් මත එම ගමන් මළු ස්කෑන් යන්ත්‍රය තුළට දමා පරීක්ෂා කරද්දී මෙම උපකරණ අඩංගු පෙට්ටි 11 ක් සොයා ගත් බව රේගුව කියයි.

පසුව කරන ලද විමර්ශණ වලදී හෙළිවී ඇත්තේ නඩේ ගුරා විසින් අදාල උපකරණ සහිත ගමන් මළු බැතිමතුන් කිහිපදෙනෙකුට චෙන්නායි වලදී ලබා දී ඇති බවයි.

වන්දනා නඩ සඳහා දී ඇති සහනය අනිසි ලෙස යොදාගනිමින් විවිද ජාවාරම් කරන බවට  රේගුවට පැමිණිලි ලැබී ඇති බැවින්  අනුන්ගේ භාණ්ඩ හෝ ගමන් මළු තමා සන්තනකෙයේ තබා නොගන්නා ලෙස රේගුව අවධාරණය කරයි.

මේ පිළිබඳ විමර්ශණ කටයුතු ගුවන්තොටුපොළ රේගු අධ්‍යක්ෂිකා ලෝෂිනී පීරිස් මහත්මියගේ මෙහෙයවීමෙන්    රේගු අධිකාරීවරුන් වන නිමල් තිලක, එච්.පී.එස් නුගවෙල සහ කේ.පියතිස්ස යන නිලධාරීහු සිදුකරති.

දීපා අධිකාරී , ටී.කේ.ජී කපිල

Share this: