ජනතාවගෙන් ලැබෙන ලිපියට පිළිතුරක් හෝ ලබා දීමට අමතක වන රජ්‍ය නිලධාරීන්..

ජනතාවගෙන් ලැබෙන ලිපියට පිළිතුරක් හෝ ලබා දීමට අමතක වන රජ්‍ය නිලධාරීන්..

රජයේ කාර්යාල වලින් සේවය ලබාගැනීමට, රජයේ කාර්යාල වලට දිනපතා පෙළගැසෙන පොදු ජනතාවගේ ප්‍රමාණය අති මහත්ය. ඔවුන්ගෙන් අතිමහත් පිරිසක් රටේ සංවර්ධනයට කුමන හෝ ආකාරයකින් දායක වන බව අමුතුවෙන් කිවයුතු නොවේ.

තම කටයුතු කර ගැනීම සදහා, කාර්යාල තුල විශාල ලෙස තම වටිනා කාලය නාස්ති කිරීමට සිදුව තිබේ. එමෙන්ම, යම්කිසි සේවාවක් රජයේ කාර්යාලයක් මගින් කරවා ගැනීමට, තමන් විසින් පිළියෙළ කරගත් රාජකාරි ලිපි ලේඛන ලියාපදිංචි තැපැල් මාර්ගයෙන් හෝ රජයේ කාර්යාලයට ඍජුවම ලැබීමට සලවනු ලැබේ.

ඉන්පසු, සේවා ලාභියා, තමන්ගේ රාජකාරිය, තමන්ට අදාල ආයතනය මගින් ඉටුවේයැයි සති, මාස හෝ අවුරුදු ගණන් බලාපොරොත්තු සහගතව කාලය ගෙවමින් සිටියි.

නමුත් කණගාටුවට කරුණ නම්, සේවා ලාභියා විසින් ඉල්ලුම් කරන ලද රාජකාරි ලිපියට, එම ලිපිය ලද බව හෝ එම ලිපිය අදාල නිලධාරියා විසින්, අදාල යොමුකිරීම් සිදුකර ඇති බවක් හෝ අදාල රාජකාරියේ වර්තමාන තත්වය පිළිබද කිසිම අවබෝධයක්, පිළිතුරු ලිපියක් ලබා දීමට බොහෝ රජයේ නිලධාරීන්ට අමතක වී ඇත.

තවද, තමන්ගේ රාජකාරිය, තමන්ට අදාල ආයතනය මගින් ඉටුවේයැයි සති, මාස හෝ අවුරුදු ගණන් බලාපොරොත්තු සහගතව සිටියත්, එය කිසිදා ඉටු නොවේ. තම රාජකාරි මේසය මතට පැමිණෙන රාජකාරි ලිපිය, විදුලි පංකාවේ සුළං සැරට විසි වී අස්ථාන ගත වී, කුණු කුඩයෙන් පසුව කඩල, වඩේ, රටකජු විකුණන වෙළෙන්දාගේ තවත් කඩල, වඩේ ඔතන කඩදාසියක් බවට පත්වී ඇති අවස්ථාවලට උදාහරණ දුලභ නැත….

දිනෙන් දින දියුණු වන තොරතුරු තාක්ෂණය මගින්, රාජ්‍ය සේවය කාර්යක්ෂම කර, ජනතාවට සැහීමකට පත්විය හැකි ඵලදායි සේවයක් ලබාදීමට කටයුතු කල හැකිය.

උදාහරණයක් ලෙස දැනට, ශ්‍රී ලංකා පොලිස් නිල වෙබ් අඩවියේ , “පොලිස්පතිතුමාට කියන්න ” යන කොටස මගින්, රටේ ඕනෙම පුරවැසියකුට, ශ්‍රී ලංකා පොලිසියේ සේවය ඉතාම කඩිනමින් ලබාදීමට, එම වෙබ් අඩවිය මගින් ඉඩ සලසා ඇති අතර එය ඉතා අගය කොට පැසසිය යුතුවේ.

එම වෙබ් අඩවිය මගින් ,අදාල සේවාව ලබාගැනීමට, අදාල විද්‍යුත් පෝරමය පුරවා, පොලිස්පතිතුමාට යොමු කල හැකිය. තවද, අදාල සේවා ඉල්ලීම /පැමිණිල්ලට අදාල යොමු අංකය, දිනය, වෙලාව ආදී විස්තර ස්වයංක්‍රීයව සේවා ලාභියාට ලැබීමට සලස්වනු ලැබේ. ඉන්පසුව, තමන්ට ලැබෙන යොමු අංකය භාවිතා කරමින්, තම සේවා ඉල්ලීම /පැමිණිල්ල සම්බන්ධයෙන් දැනට ගෙන ඇති පියවර, සහ අදාළ යොමු කිරීම් පිළිබදව මනා අවබෝධයක් ලබා ගැනීමට පිළිවන. මෙම ක්‍රමය මගින්, සේවා ලාභියාගේ තෘප්තිය රැකිය හැකිය. තවත් මෙම කරුණ පැහැදිලි කරන්නට, මගේ රැකියාව සහ බැඳි නිදසුනක් කිහිපයක් ඉදිරිපත් කරන්නෙමි.

රෝහලක යම් ගැටළුවක් යොමුකිරීමේ පිළිවෙල නම්, තම ගැටලුව ආයතන ප්‍රධානියා වන, ප්‍රධාන වෛද්‍යතුමා මගින්, ප්‍රාදේශීය සෞඛ්‍යය සේවා අධ්‍යක්‍ෂක තුමාටද, ඉන්පසුව පළාත් සෞඛ්‍යය සේවා අධ්‍යක්‍ෂක තුමාටද, වැඩිදුර යොමුකිරීමක් අවශ්‍යය නම්, සෞඛ්‍යය අමාත්‍යංශයේ ලේකම්තුමාට ද යොමුකරයි.

නමුත් මෙම ක්‍රියාවලිය මෙලෙසම සිදුවන්නේ අතරමැදි නිලධාරීන් තම රාජකාරිය නිසි ලෙස ඉටුකරන්නේ නම් පමණි. ඇතැම් නිලධාරීන් සිතාමතා තම රාජකාරිය ඉටුකිරීමට කල් මරමින් සිටියි. ද්වේශ සහගතවම රාජකාරිය අතර මග නතර කරයි.

ලිපි ලේඛන සගවයි. අස්ථානගත කරයි. මෙම කිසිවක් ආයත හෝ දෙපාර්තමේන්තු ප්‍රධානියා නොදනියි. රාජකාරියේ අවසන් ඵලය ලබන සේවාලාභියා සිදු වූ දෙය කිසිසේත්ම නොදනී. උදාහරණයක් ලෙස, රෝහලක ඇති බෙහෙත් හිගයක් පිලිබදව පැමිණිලි කරමින් ලිපියක් අදාල ඉහළ නිලධාරීන්ට ලිපියකින් දැනුන්දුන් විට, එම බෙහෙත් හිගයට වගකිව යුතු නිලධාරියා හරහා එම ලිපිය යොමුවීමේදී, එය ඉහලට යොමුකිරිම වළක්වාලිය හැකිය.

එසේම, ඉහළ නිලධාරියෙකු විසින් රාජකාරි අණක් පහළට යොමු කිරීමේදී අතරමැද දී එය වලක්වන අවස්ථා එමටය. මේ වෙනුවට, අන්තර්ජාලය ඔස්සේ තම අවශ්‍යයතාවය ආයතනයේ හෝ දෙපාර්තමේන්තුවේ හෝ අමාත්‍යංශයේ ප්‍රධානියාට ඍජුවම ඉදිරිපත් කළහැකි අතර, එම සේවාව ලබාදීමට ගන්නා සෑම පියවරක් පිලිබදව සහ සෑම යොමුකිරීමක් පිළිබද විස්තර අදාල අනුආයතන මගින් අදාල ආයතන ප්‍රධානියාත්, සේවා ලාභියත් නිරතුරුව අන්තර්ජාලය ඔස්සේ දැනුවත් කරමින්, ආයතයේ ඉහල නිළධාරියාගේ සිට පහල නිළධාරියා දක්වා රාජකාරිය සම්බන්ධීකරණය වන අතර එමගින්, රජයේ නිළධාරීන්ට කිසිම විටක තම රාජකාරිය නොසලකා හැරිය නොහැකිය.

රාජකාරිය අතපසු කල නොහැක. අතර මැදි නිළධාරීන්ට සේවාව සැපයීම පැහර හැරිය නොහැකිය. ඉතාමත්ම, වැදගත් කරුණනම්, සේවා ලාභියාට තම සේවාව හෝ කාර්යය සාර්ථකව ඉටුවන අයුරු, බලාපොරොත්තු සහගතව සහ විමසිලිමත්ව අධ්‍යනය කල හැකි වීමය.

මෙපරිදිම, අනෙකුත් වැදගත් රාජ්‍ය ආයතනවල හෝ වෙබ් අඩවි යාවත් කාලීන කර, නව තාක්ෂණයේ උපරිම ප්‍රයෝජන ගෙන, යහපත් රාජ්‍ය සේවයක් සලසා දීමට සැලසුම් සකස් කරන්නේ නම් ඉතාමත් අගය කොට සලකමි.

ස්තුතියි.

වෛද්‍ය ඩබ්.ඒච්.අයි.ගුණවර්ධන
පොලොන්නරුව.

Share this: